Një 37-vjeçar është arrestuar nga policia e Fierit, ku “Forca e Ligjit” ka goditur sërish në këtë qytet. Si rezultat i kontrolleve, në një lokal në Zhupan, Aleksandër Hoxhaj, i cili ishte shpallur në kërkim nga Seksioni për Hetimin e Krimit Ekonomik për veprën penale “Falsifikimi i letërnjoftimeve, pasaportave apo vizave”, u kap me armë zjarri.
Sapo 37-vjeçari ka parë policinë të hyj në lokal ka hequr armën nga brezi dhe e ka hedhur nga dritarja e lokalit por falë veprimeve të shpejta të policisë u konstatua veprimi i tij, duke u arrestua në flagrancë.
Ndërsa gjatë kontrollit të banesës së këtij shtetasi ju gjetën lëndë narkotike e dyshuar Cannabis Sativa, 3 dokumente të falsifikuara: pasaportë, kartë identiteti dhe leje drejtimi automjeti në gjuhën Greke me foto të këtij shtetasi, sende të ndryshme të dyshuara që përdoren për kryerjen e vjedhjeve, si dhe sende që dyshohen se i ka vjedhur. Ndërkaq, Hoxhajt iu gjet edhe fishekë pistolete dhe automatiku.
Ndërkohë që 11 persona me precedentë penal janë shoqëruar në polici.
Kontrollet do vijojnë në gjithë Qarkun e Fierit për parandalimin dhe goditjen e paligjshmërisë, me qëllim rritjen e parametrave të sigurisë.
